«Bastaý Bıznes» – halyqqa kásip ashýǵa kómektesetin irgeli jobalardyń biri. Nıettengen kez kelgen adam bir aılyq bıznes-kýrstan ótip, jobanyń múmkindikterin paıdalana alady. Osynda bilimin jetildirgen Qyzyljar aýdanynyń turǵyny Olga Komarovanyń qazir jeke shashtarazy bar.
«Kásip júrgizýdiń qyr-syryn úırengennen keıin komıssııa aldynda bıznes-josparymdy sátti qorǵap shyqtym. Utyp alǵan 240 myń teńge grantqa qondyrǵylar men jıhaz satyp aldym. Kýrsta tanysqan eki kelinshekpen birigip ǵımarat jaldap, jumys istep jatyrmyz», deıdi jas kásipker.
Daıarlyq kýrsynan ótken Dıana Omarova– manıkıýr jasaýdyń sheberi. Ol da memlekettik grantqa qajetti qural-jabdyqtar satyp alǵan. Búginde qyz-kelinshekterdiń tyrnaqtaryn ádemilep, qastaryn túzeýmen aınalysady. Ol qyzmet kórsetýmen ǵana shektelmeı, manıkıýr mektebin de ashyp alǵan. Bir aptalyq sabaqtar aıasynda tyrnaq árleýdiń álippesin úıretedi. Arnaıy sertıfıkat alǵandardyń arasynda jumysqa ornalasyp ketkenderi barshylyq. Shashtarazben kórshiles bólmede eski jastyqtardyń mamyǵyn tazalaıtyn shaǵyn seh ta «Bastaý Bıznes»-tiń arqasynda ashylǵan.
О́tken jyly Qyzyljar aýdanynyń 181 turǵyny joba kýrstarynan ótip, 20-sy shaǵyn nesıe alsa, 76-sy qaıtarymsyz grantqa qol jetkizgen.
Oblystyq kásipkerler palatasynyń bólim basshysy Aleksandr Berdnıchenkonyń aıtýynsha «Bastaý Bıznes» jobasyna qatysýshylardyń 363 -i aýyl sharýashylyǵyn qarjylaı qoldaý qorynan nesıe alǵan. 551 adam grantqa qol jetkizgen. Olardyń 97 prosenti aýdandarda turady.
О́mir ESQALI,
«Egemen Qazaqstan»
Soltústik Qazaqstan oblysy
